Os em See

Wenn me ned wott gfonde wärde
gett s emmer no de Waalesee

mit sinere faabelhafte Tiefi
ond Schtrömige wo nedsi gönd

sech verzwiige ond usbreite
wien es onbekannts Land.

Me seit of em Grond vom Waalesee
wörd men e ganzi Zivilisation fende

vo all dene wo händ müesse goo
ooni e Schpur z henderloo ond vo all

dene wo verschlockt worde send
ooni en Absched oder es Wonder.

Me seit a mänge Tääg wärfe
d Wälle es Echo a d Felswänd

ond me gsääch en Schemmer wo
wiit i de Fäärni bes a d Nordsiite

zeigt dööt wo Hanfpalme
ond Fiigeböim wachse.